ELKARRIZKETA

Izena: Jurgi

Abizenak: Olasagasti Ibargoien

1. Nor zara? Hau da, zein da zure eginkizuna arlo honetan?

Gaur egun, kirol modalitate honetan Usurbilgo Pagazpe pilota kirol elkarteko entrenatzailea naiz.

2. Zutaz gain, nor gehiago dago proiektu hau aurrera eramateko?

Proiektu honetan, Gipuzkoako Kirol Egokituko Federazioa, Gipuzkoako Euskal Pilota Federazioa eta bi elkarte gabiltza Gipuzkoan, Pagazpe eta Errenteriako Mindara asoziazioa.

3. Zerk edo nork bultzatu zintuen mundu honetan sartzera?

2009. urtean, Jarduera Fisiko eta Kirol Zientzien Lizentziatura ikasten ari nintzela, Oidui Usabiaga eta Montse Oterok eskaini zidaten kirola ezagutu eta esku botatzeko aukera. Zalantzarik gabe, esperientzia probatzen hasi nintzen eta geroztik disfrutatzen nabil.

4. Nola bultzatzen duzu urritasun fisiko hau duten jendea arlo honetan murgiltzea?

Helburua, jarduera fisikoa edo kirola egitea da, osasunarentzat egokia delako. Askotan, urritasuna duten pertsonek uste dute kirola ezin dutela egin. Kirola egitera bultzatzen ditugu eta euskal pilota Gipuzkoan gustukoa den kirola denez eta bestetik taldean dugun giroa erakargarria denez, esperientzia probatzea aberasgarria dela uste dut. Kirolaz gain, urritasun egoeran dauden pertsonentzat garrantzitsua izaten da egoera antzekotan dauden beste pertsonekin esperientziak elkar trukatzea. Beraz, kaletik norbait ikustean, edo Gipuzkoako Kirol Egokituen Federaziora norbait etortzean kirola frogatzera animatzen ditut entrenamendu egunak eta orduak noiz eta non diren esanez, kirolaz hitz egiten eta dituen gaitasunak potentziatzeko animatuz.

5. Ze eboluzio antzeman duzu gurpil aulkidun jendearen artean hasi zinenetik gaur egunera arte?

Eboluzio nabarmenena, aulkiak mugitzeko gaitasuna da. Batetik, mugimendu gehiago egitera behartuz eta bestetik, aulkia asko mugitu araziz. Horrek hein handi batean askatasuna eta kaletik ibiltzeko abilezia gehiago izatea suposatzen du. Hau da, bizi kalitate hobea izatea. Nola ez, entrenamenduek pilotaren jokoa asko hobetzen dute eta guztiek egin duten hobekuntza oso handia izan da joko mailan baita.

6. Zein da zuen plangintza? Topaketak, entrenamenduak…

Gure helburua, urte osoan pilotaz disfrutatzea da eta hori entrenamenduetan egiten dugu. Partiduak jokatzea gustuko dugu eta Gipuzkoako txapelketa jokatzen dugu, baina elkar topatzeko aitzakia gehiago izaten da txapelketa irabaztea baino.

7. Nola lortzen duzue materiala? Laguntzak dituzue? Laguntza nahikoa al dira?

Gurpildun aulkiak dira garestienak eta horretan Gipuzkoako Kirol Egokituko Federazioak eta Gipuzkoako Euskal Pilotako Federazioak lagundu zuten. Ongintzako partiduak ere jokatu ziren egun berezi batean aulki bat erosi ahal izateko eta enpresa batek ere aulki bat erosteko dirua jarri zuen. Hortaz aparte, elkarteek udaletxetik izaten duen diru laguntza eta elkarteetako babesle eta kuotetatik mantentzen dira material gehienak. Azkenik, Gipuzkoako Foru Aldundiko diru laguntza berezietan egiten da eskaera.

8. Pozik al zaude lortutakoarekin, zure helburuak bete al dira?

Oso pozik nago, gaur egun jende gehiagok parte hartzen duelako. Dena den gure helburua Gipuzkoan eta Euskal Herria kirol modalitate hau zabaltzea da eta hori lortu ahal izateko urte asko pasa beharko dira.

9. Etorkizunean nola ikusten duzu proiektu hau?

Egia esan, ez dakit nola izango den etorkizuna. Baina Valentzian, Tarbais-en eta Baionan jokalariak daudela badakigu eta elkarrekin jokatzeko aukera gehiago izateak ezagunagoa egitea ekar dezake. Gustatuko litzaidake Gipuzkoan beste tokiren batean ere taldetxo bat aterako balitz eta Espainiako federaziotako batek kirol modalitate hau bere gain hartuko balu.

10. Azkenik gure elkarte hau sustatzeko ze gai sakonduko zenuke gehienbat?

Gure elkartean parte hartzaile gehiago izan ahal izateko, sentsibilizazioarekin eta ezagutzera emateko ahaleginarekin jarraitu behar da. Urritasun fisikoa dutenak parte hartzera animatuz eta baita urritasunik ez duten pertsonak, gizon zein emakume.